INCIPIT LIBER NONUS.
9.1 De adornationibus.
9.1.1 Prologus.
Ea, que serenant et clarificant dictamina oratorum, merito debent
adornationes vel colores ab omnibus appellari, quia discolorata est oratio, quam adornatio
aliqua non colorat. Videmus enim, quod celum est planetis et signis mirabiliter
adornatum. Item omnes communes materie vel private sine adornatione vilescunt.
Adornatur thalami, arma et parietes dipinguntur, colorantur panni, lapides sculpuntur et
ligna, deaurantur metalla, poliuntur equi, mulierum facies dealbantur et quicquid pertinet
ad honorem aliquem requirit ornatum. Nimirum ipsa natura lapides pretiosos, herbas,
arbores, coloribus diversis adornat. Unde nobis prebet necessaria documenta, ut
nostrarum orationum seriem mirifice adornemus.
9.2 De transumptionibus.
9.2.1 Quid sit transumptio.
Transumptio est mater omnium adornationum, que non desinit dicendorum
genera curcuire. Vel transumptio est quedam imago loquendi, in qua unum ponitur et
reliquum intelligitur. Vel transumptio est transmutatio locutionum, que semper
intellectum imaginarium representat. Vel transumptio est positio unius dictionis vel
orationis pro altera, que quandoque ad laudem, quandoque ad vituperium rei transumpte
redundat. Vel transumptio est quoddam naturale velamen, sub quo rerum secreta
occultius et secretius proferuntur.
9.2.2 Unde
dicatur.
Transmumptio dicitur a transumo transumis et dicitur transumere,
idest transponere, significationem vel partem significationis unius dictionis vel
orationis in alteram. Vel dicitur transumere, idest transumutare significationem
dictionis in aliam dictionem vel orationis in aliam orationem secundum imaginarium
intellectum.
9.2.3 Quare
fuit inventa.
Manifestum est enim vel esse debet quare transumptio fuerit
inventa. Nam cum aliquis intendit aliquem vel aliquam vel aliquid commendare vel
vituperare, non satisfecit anime desiderio, si dicat bonus vel malus est,
aut peior vel pessimus, aut bona vel mala, peior vel pessima.
Unde propter inenarrabilem mentis affectum illum vel illam vel illud in aliam rem nititur
transmutare, que ad nimiam exaltationem vel depressionem pertimere noscuntur.
Huiusmodi siquidem transumptiones fiunt de omnibus rebus, que in mundiali machina
continentur, non sine probabili motu nature. Celestia etiam et terrestia ad invicem
transumi videntur, sicut per visiones intelligimus prophetarum, et in Apocalypsi Iohannis
plenius intuemur. Scimus nempe, quod Iherusalem terrestris transumitur in
celestem. Anima etiam sepe transumit, quia dormientibus pericula vel commoda futura
per diversas et contrarias imaginationes ostendit. Unde plurimi dormiendo terrentur
et aliqui non modicum gloriantur. Huiusmodi namque somnia mortales arbitrabiliter
interpretari laborant, quoniam unusquisque appetit videri, quod non est in
interpretationibus somniorum, ut credatur fore similis Ioseph, qui fuit interpretatus
somnium Pharonis.
9.2.4 Ubi
fuerit inventa.
In terrestri Paradiso, in quo Deus hominem ad imaginem et similitudinem
suam formavit, transumptio sine dubio fuit inventa.
9.2.5 Quis
primus fuerit inventor.
Primus inventor fuit ipse Plasmator, qui protoplausto precepit, dicens:
"De omni ligno Paradisi comedes, de ligno autem scientie boni et mali ne comedas."
Ecce vides, quiod posuit lignum pro fructu. Illa quippe transumptio diversas
opiniones induxit. Quidam enim credunt lignum illud fuisse pomum, alii ficum, alii
consentientes errori arbitrantur fuisse commixtionem carnalem. Ex eo nimirum de
transumptis opiniones diversimode oriuntur, quia omnis transumptio frequentius obscurum in
se continet intellectum.
9.2.6 Quid
transumptio conferat utilitatis.
Evidens est utilitas transumendi, quia vilis et nudus est tractatus,
quem in aliqua parte transumptio non exornat. Transumptiones enim possunt gemmis
pretiosis probabiliter similari, que auro vel argento ad decorem operum per manus providi
artificis inseruntur. Et ut breviter comprehendam, nulla oratio est vel esse potest
absque suffragio transumptionis iocunda.
9.2.7 Quomodo
in eodem genere transumere possit orator.
In eodem genere fit transumptio, cum propter aliquem evidentem
effectum alterius nomine appellatur. Pone, aliquis continuat omnes dies in planctu vel
risu: quare poterit Democritus vel Diogenes appellari. Potest namque Otto, cui papa
Innocentio cum gladio spirituali verticem coronatum abscidit in Saulem vel Goliam propter
magnitudinem stature transumi; rex Federicus in David, et ipse Innocentio papa in Deum,1 quia omnia quecumque voluit, fecit. Idem vero papa
Aquileiensem patriarcham qui super continentia clericorum in concilio sibi contradicere
attentabat,2 Panuntium3
appellavit.
9.2.8 Quomodo
in diverso.
In diverso genere fit transumptio, quando irrationale animal ponitur
pro rationali, vel res unius materiei pro altera ponitur. Fortis equidem bellator
aliquando transumitur in leonem propter excellentiam fortitudinem, aliquando in draconem
propter incomparabilem excellentiam, quandoque in aquilam propter excellentem ingenii
claritatem. Non enim ab re Iohannes fuit transumptus in aquilam, Marcus vero in
leonem, Lucas in vitulum, Mattheus in hominem. Aquila nempe iuxta celum dicitur
volitare, et propter multiplices effectus avium regina esse meretur. Leo rex est
bestiarum. Et vitulus, quia ruminat, ad sulcandum terram crescit aratro, mysticum in se
continet intellectum. Amplius Spiritus Sanctus apparuit in specie columbe
transumptus. Salomon autem ecclesiam vel secundum Hebreos matinalem amicum, in
columbam transumpsit. Iuvenalis simplices et impotentes in columbas transumpsit et
tyrannos in corvos, ubi dixit: "Dat veniam corvis, vexat censura columbas."
Scriptura criminosas in iumenta et peccatores sive peccatum in stercus
transumit, ubi dicitur: "Computruerunt iumenta in stercore suo."
Item aliquis transumitur in asinum aut propter ingenii durit, quo asinina ruditate
brutescit, aut quia non vult alicui cedere, aut propter horribilitatem vocis vel
magnitudinem aurium aut frequentem emissionem trullarum; aliquis in porcum propter fedam
et turpem consuetudinem. Quidam presbyter semper sucidas vestes ferebat, et non
removebat ungues, non lotis manibus manducabat, permiscebet omnia victualia in parapside,
ad modum porci sugebat brodum, quo barba spissa humebat; quibus de causis presbiter porcus
ab omnibus vocabatur. Porci etiam sunt animalia rigida, unde illi qui rigiditatem
ostendunt transumuntur in porcos.
Proditor transumitur in serpentem, unde dicitur "serpens homini
tuto pestifera tractat, et cum friget non desunt illi venena, sed torpent."
Invidi transumuntur in canes, unde Hieronimus invidos suos canes
appellat, propter manifestos effectus. Possunt autem non immerito in scorpiones
transumi, quia semper fundunt cum cauda venenum.
Dolosi namque homines in vulpes, raptores in lupos, timidos in lepores, sub
aqua nantantes in mergones, tentantes artes et quaslibet facultates in simias, currentes
ad nuptias et famosa convia in vultures, sectantes vilia in milvos, et depilatores in
corniculas transumuntur.
Avarus transumitur in hydropicum et in serpentem, qui thesaurum
custodit, et etiam in in scarabeum, qui dispera stercora in fasciculum rotundam nititur
glomerare et laboriosis impulsibus intra cavernam mittere, ut glomeratum occultet.
Usurarius transumitur in sanguisugam et vermen, qui dicitur
cancer.
Item transumitur homo in pecudem propter bestialem simplicitatem.
Transumitur in hircum autem propter fetorem luxurie vel prolixitatem barbe, vel quia ille,
qui transumitur, de uxore dicitur esse cornutus.
Ego vero magistrum noviter cathedratum in hircum et disputatores, cum
eo transumpsi in canes dicens: "Latrant canes ad lunam, dum sedet hircus in
cathedra et rabbi appellatur." Hircus enim est animal monstruosum et
derisibile propter cornua, barbam et genitalia, que substantiam principalem
excedunt.
9.2.9 Quomodo
vocabulum secundum occultam similitudinem transumantur.
Per occultam similitudinem transumpsit Dominus panem in corpus
suum. Panis cum carne habere similitudinem non videtur, sed vinum aliquam habet
similitudinem cum sanguine. Multi namque panem electum transumunt in zucarum et
saporosum vinum in syrupum.
Item populum Israeliticum et etiam ecclesiam in vineam suam
transumpsit, in quibus non est similitudo apparens. Simili namque modo calicem
posuit pro passionem et bibere pro sustinere.
Item ille qui dixit: Licet pennas habeas, quibus volare in
solitudinem satagis, ligate sunt tamen nexibus preceptuum, que sic te vinciunt, ut liberum
non habeas absque nostra permissione volatum, per similitudinem occultam
transumpsit. Per pennas intelligimus ibi voluntates, aut proposita seu vota
vel motus animi aut inspirationes divinas. Nexus vero sunt nodi papalis
auctoritatis. Et volare in solitudinem idest transferre se de dignitate ad
religionem. Liberum volatum idest liberum arbitrium transferendi. Per
occultas similitudines clerica transumitur in coronam, in aream, in monetam. Occulta
enim similitudo est in qua vocabulum, quod transumitur cum dictione pro qua ponitur,
contrariam videtur similitudinem habere.
9.2.10 Quomodo
secundum manifestam.
Per manifestum similitudinem fit transumptio, quando in locutione
ponitur adverbium similitudinis, ut "Sanctitudines florebunt, sicut lilium et
sicut balsami erunt ante te." Verumtamen ubi veri similitudo intervenit,
non dicitur proprie transumptio, sed quedam species transumptionis. Similiter
ubicumque ponitur dictio demonstrative, non dictitur esse proprie transumptio, ut "ecce
lupum" vel "iste est vulpes", quoniam ex vi demonstrationis
velamen sine dubio removetur.
9.2.11 De
curialitate transumendi.
Scientie naturalis inquisitores verba significantia turpitudinem
curialiter transumunt et sub velamine cautele occultant. Nam culum "circulum
pudibundum" appellant, humanum corpus in tres regiones distinguunt, stercus autem
et urinam "superfluitatem prime digestionis" esse dicunt et humorum
superabuntiam "materiam" vocant. Vulvam transumut in "ianuam"
et membrum virile in "virgam". Item sperma transumunt in "semen"
et matricem in "conceptionis monetam" vel in "agrum generationis
humane." Sputa quidem "screationes" et mucilagines "superfluitates"
appellant. Menstrua esse dicunt "secretam purgationem" vel "kalendarum
tributua".
Item cloacam vel latrinam in "sellam" et "urinalem
scaphum" vel "calicem" vocant. Per eorum quippe doctrinam
rotunda stercora "squibala" nominantur. Sed quidam curialis cloacam
transumunt, illam esse "cameram" profitentes. Unde quandoque
dicitur "domina non potest ire ad cameram" vel "ad cameram vadit
plusquam natura valeat sustinere" vel "decies ad cameram iam ivit"
et curialius est dicere quam "decies assellavit."
Item pauperes, qui stercora canum recolligunt, curialiter officium suum
transumunt, dicentes ipsum stercus esse "allumen". Quidem autem
rustici fimos, quos ad impinguandum campos deportant, transumunt in genera
specierum. Proditores vero et adulatores curilaliter possunt in "apes"
transumi, quoniam apes in ore mel habent et in aculeis caudarum venenosa puncturas.
9.2.12 De
ineptitude transumendi.
Ineptitudo transumendi ex transumentium simplicitate noscitur
prevenire. Quidam nobilis de propria uxore loquens ait "Vacca mea peperit
vitulum" et alius dixit "meam asinam gravidam". Alius
uxorem suam transumpsit in "catulam", ex eo quod geminos peperit.
Alius autem rusticus spissam et croceam piperatam transumpsit in stercora puerorum, et
alius medicinam distemperatam in asinarum micturam. Item innumerabiles viri et
mulieres sub quadam specie furoris homines et res carissimas in stercora et res vilissimas
transumere non pavescunt.
9.2.13 De
transumptione que fit secundum accidens.
Secundum accidens animata et inanimata frequentissime
transumuntur. Inveniuntur homines, qui habent extrema pilosa et supercilia densa et
longa. Unde a quosdam ursi vocantur vel transumutur in alia pilosa secundum
libitum transumentium. Quidam erat nasicurvus, unde Nasus de gatta
vocabatur. Quidem habebat vultum longum et magnas aures ultra quam qualitatem sue
substantie, quare Vultus asini dicebatur. Salerni fuit physicus, cui nomen
erat Matheus Hypericon, ex eo quod ad similitudinem herbe, que dicitur hypericon videbatur
habere faciem perforatam. Infiniti namque ceci, strambi, claudi, retorti, calvi,
gibbi, surdi, nasicurvi, albi, nigri et rubei per accidentia nuncupantur. Idem etiam
de animalibus irrationalibus, nominibus locorum et diversis rerum generibus noscitur
provenire.
9.2.14 Quod
transumptum aliquando transumatur.
Deus transumitur in agnum et agnus in pascha. Prelati enim
transumuntur in pastores, pastores in predicatores, predicatores in boves, et etiam in
mercenarios atque canes. Populus namque transumitur in ecclesiam, et ecclesia in
vineam. Item populi transumuntur in oves, ubi dicitur "Oves mee vocem meam
audiunt." Transumuntur etiam in asinas, ubi dicitur "Boves arabant
et asine pascebantur iuxta illas."
9.2.15 Quod
aliqua contraria in unum et idem secundum diversus effectus aliquando transumatur.
Deus transumitur in leonem et diabolus in leonem propter diversos
effectus. Homo transumitur in vermem arachneum, et diabolus in eundem pro diversis
causis. Nam cum homo transumitur in muscam, et cum diabolus in eumdem vermem
transumitur, homo transumitur in muscam.
9.2.16 Quod
aliqua per diversos effectos in bonam et malam transumuntur.
Mulier speciosa transumitur in deam: Veneram, Palladem et
Iunonem; in solem, lunam et stellam; imperatricem, reginam; in lamiam, in balsamum,
ambram, muscum et manna. Transumitur etiam in palmam, laurum, Libanum cedrum, olivam
et pinum; item in columbam et turturem; item in gemmam pretiosam, margaritam, lilium,
rosam, violam, florem et mandragoram, et quandoque in antiquas et famosas dominas, ut in
Helenam et Isoctam. Amplius capilli transumuntur in aurum contortum, oculi in
stellas, dentes in ebora, supercilia in cardines gemmatos, pectus vero transumitur in
hortulum odoramentorum, et corpus in pomerium florigerum seu pratum amenum. Mamille
transumuntur in poma Paradisi, vel globos rosarum; brachia in ramos Libani, crura et coxe
in cristallinas columnas. Membrum autem pudibundum transumitur in ianuam Paradisi,
in anulum aureum, et apothecam disiderabilium specierum. E contrario autem mulier
speciosa transumitur in templum edificatum super cloacum et transumi posset in rosam
fetidam et amor ipsius in dulce venenum. Transumitur etiam in viperam, scorpionem,
in cineram et capram.
Item transumitur in passerem, in catulam, in lupam, in sagittam
toxicatam, in calamitam, in arundinem, in rubiginem, voraginem, eruginem et latrinam et
quandoque in feminas antiquas et infames, ut in Evam et Medeam, Semproniam et
Calpurniam. Dicitur etiam membrum diaboli, caput peccati, et expulsio
Paradisi. Forme quidem corporis et ornamenta transumuntur in diaboli
armaturas. Pudibundum eius transumitur in portum confusionis, in os inferni, in
rivulum aque fetentis, in antrum, in speluncam luctuosam, in fornacem ignis ardentis, in
dolium, in scarpsellam et in vaginam. Transumitur etiam in puteum. Unde cum
quidam homunculus mulierem longam et pinguissimam desponsavit, circumstantibus dixi "Neque
cum quo hauriat habet et puteus altus est." Transumitur etiam in lacunam
putridam, in torcular fecis, et in labyrinthum pudoris.
Item quidem stulti ponunt pollicem loco tentiginis inter indicem et
pudicum, et ad inferendam ignominiam fictionem illam causa ludi vel ire ad invicem sibi
ostendunt, et ex tali offensione aliquando scandali materia generatur. De membris
autem virilibus, mulierum pudibundis et luxurioris gestibus, voluptuosis viris et lascivis
muleribus transumendi peritiam derelinquo.
rubr. malam]
molam ed.
9.2.17 De
transumptione contra sodomitas.
Gomorrheus deorsum et sursum declinat, quando syllogizat in prima
figura. Vel hastam pollice satagit, quando syllogizat in secunda figura. Vel
gomorreus de inferiori circulo facit embolum, et lac in cloaca reponit. Vel
gomorrheus super lege, qua dicitur Cum vir nubit in feminam, facit maximum
apparatum. Vel gomorreus agitat ramum arboris, ut ros de illa descendat. Vel
burdonem equitat, ut ningat december in agrum.
9.2.18 Quomodo
bona transumantur in mala.
Quidam, qui cognoverat monialem dixit: "Non violavi thorum
divinum, sed quia me in sua factura Dominus delectavit, cornu eius studui exaltare."
Item posset monialis dicere amatori: "Virga tua et baculus
tuus, ipsa me consolata sunt."
Item possent dicere suis amatoribus mulieres: "Date nobis de
oleo vesto, quia nostre lampades extinguuntur."
9.2.19 De
transumptione metallorum.
Alchimici transumut aurum in solem, argentum in lunam, es in
Martem, aurichalcum in Venerem, argentum vivum in Mercurium, ferreum in Scorpionem,
plumbum in Saturnum, et stagnum in Iovem.
Item transumunt argentum vivum, salem ammoniacum, sulphur et auri
pigmentum in spiritus.
9.2.20 De
cavillosis et subdolis transumptionibus.
Mulieres quadam fictitia dolositate mirabiles faciunt transumptiones,
et nihil est in actibus amoris, quod per vocem vel gestum non transumunt. Maritos
enim vel amasios aliquando hircos, aliquando arietes, aliquando tauros, aliquando cervos
appellant, et tacito substantivo aliqua derisorie dicit: "Meus pascit in pratis"
vel "misi eum Cornetum" vel "Cornacanum" et "ego
faciam sibi oleum de cucurbita hortulana".
Item quandoque dicitur de scholari studente, qui domi reliquit uxorem,
quod fundum Cornelianum incepit noviter possidere, et quod nuper in horto suo plantata sit
cucurbita hortulana. Transumunt etiam femine animalium cornua in coronas et
diversificant genera cornutorum. Sed queri potest quare cornua, cucurbita et cuculus
significent pudorem mariti, cuius thorum uxor violare presumit. Responderi potest,
quod hec fuit inventio lascivorum, qui semper moliuntur aliorum verecundiam
geminare. Cornua quidem ornamenta sunt animalium, sed per contrariam transumptionem
coniugatorum vertices dehonestant. Infamia namque cucurbitatis ad modum cucurbite
cito crescit, et cuculus est avis apta derisioni, ex eo quod in suo cantu cucurbitationem
vel cucurbitam geminando primam sillabam reiterare sine aliqua intermissione
videtur. Nam per talium rerum improperia frequenter inimicitie capitales et
homicidia perpetrantur.
9.2.21 De
transumptionibus ioculatorum.
Ioculatores tam in compositionibus cantionum quam in modis
loquendi omni tempore transumere omnia moliuntur. Sclavo quidem Barensis, ingeniosus
in idiomate materno transumptor, in quadam cantione amicam suam transumpsit in navem,
ornamenta, que sibi dederat in anchoras et apparatus puppis, et contradictionem et
inobedientiam ipsius in ascensum prore ad ursam, postribulum de quo illam traxerat in
portum, et solam camisiam, quam habebat in unum filium. Ioculatores etiam alii
magnam clericam transumunt in aream et parvam in monetam, cappam monachalem transumunt in
amphoram, in corbem, in lagenam, in hydriam, in metretam.
Item transumunt se ipsos in alios per voces et modos loquendi, gestus
corporum, habitus, motus et actus. Pauperes vero sanas voces in infirmas
transumunt.
9.2.22 De
transumptionibus que fiunt per imagines vel sculpturas.
Celestia, terrestria, monstra, infernalia, vera, verisimilia et
etiam fabulosa, prelia, victorie, miracula, transumpta fuerunt per imagines et sculpturas,
de quibus nemo posset plenariam exhibere doctrinam, quia quedam abierunt in desuetudinem
propter nimiam vetustatem. In quibusdam fiebant puncta pro litteris vel signa, que
homines illarum etatum sciebant, sicut manifeste patet in duodecim arcubus triumphalibus
et duabus memoralibus columnis in Urbe Romana et in columna, que Constantinopoli fuit in
Pedronio artificio miro constructa. Illa vero, que hodie transumuntur, sciri possunt
per subscriptiones et consuetudines modernorum. Ceterum imagines vel sculpture, que
facte sunt vel fuerunt causa veteris vel novi testamenti sciri possunt per memoriam
scripturarum.
Item quamplures nomina propria et sue prolis transumunt in picturas vel
sculpturas, quas fieri faciunt in marmoreis edificiis, vexillis atque sigillis.
9.2.23 De
transumptionibus que fiunt per gestus vel nutus.
Muti, naufragi a litore vel portu distantes, egri, qui loqui non
possunt, captivi et amatores, qui loqui non audent, obsessi et religiosi, per gestus vel
indicia seu nutus suos effectus transumunt, per tussiculam simulatam; cum agitatione
capitis atque risu transumunt viatores homines de Rivo cornaclario in antecessores eorum,
qui catulam comederunt. Unde quamplures ibi iam fuerunt acriter verberati.
9.2.24 Quod
utile sit cum moderamine transumere.
Ille vel illa, qui vel que transumitur causa honoris plurimum
hilarescit, et ille, qui transumitur causa pudoris, dolet non modicum et turbatur.
Idem etiam erit, sit filios vel amicos aut res, quas possidet vel diligit, transumpseris
in vilia vel iocunda. Provideas igitur quid et quando transumas, quia preclarum est
et utile oratori habere cum moderamine scientiam transumendi, presertim cum assidue
videamus, quod de transumptionibus moderatis multi amicitiam et benivolentiam
consequuntur, et plures de transumptionibus inhonestis incurrunt odium et inimicitiam
capitalem, quia inimicabiles et odiose transumptiones sunt velut acutissimi gladii, qui
corda infinitorum transfigunt.
9.3 Quomodo artes et
professiones in rotas et rotulas transsumuntur.
9.3.1 Visio Boncompagni.
Vidi undecim principales rotas et quinque subtiles rotulas volvi
orbiculariter in machina mundiali.
9.3.2 Quomodo
grammatica transumatur in primam rotam.
Prima quidem volvebatur laborioso impulsu, sed procedebat ex ea
lac quod dabatur his que erant in dentium plantativa.
9.3.3 Quomodo
dialectica in secundum.
Secunda erat citivola et cursibilis, garrula et clamosa et
moliebatur omnia tamquam importuna cameraria indagare.
9.3.4 Quomodo
rhetorica in tertiam.
Tertia vitam et mortem in se continebat et habebat capitella
nature tam rotis quam rotulis illis infixa, nec aliqua illarum poterat sine auxiliio
illius moveri. Erat etiam propter defectum artificum incompleta.
9.3.5 Quomodo
arithmetica in quartam.
Quartam sequebantur multitudines numerose, loculos plenos et
vacuos ad cingula deferentes.
9.3.6 Quomodo
geometria in quintam.
Post quintam ibant non multi, qui super colla perticas et
funiculos deferebant, lineas ad proportionem sesquialteram et diametrum inspectis
quadrangulis reflectentes.
9.3.7 Quomodo
musica in sextam.
Sextam vero milia milium sequebantur in diversa vocum modulamina
variabiliter prorumpendo et quisque sibi placebat, sed preerat omnibus Philomena.
9.3.8 Quomodo
astronomia in septimam.
Omnes autem qui super septimam ascendebant ad ima ruere
videbantur, quondam pater solus effectus illius rote in sua reservaverat potestate.
9.2.9 Quomodo
physica in octavam.
Octava circa rerum naturas assidue volvebatur, quare
appellabatur merito naturalis.
9.3.10 Quomodo
ius civile in nonam.
Nonam regere videbantur principes Urbis et orbis, iuxta quam
militabant patroni causarum qui milites appellabantur, quoniam lingue illorum erant sicut
acuti gladii quibus malefacta excedentium rescindebant. Appellabantur etiam sacerdotes qui
sacra dare videbantur, cum unicuique suum ius in integram conservabant. Sed illimet
aliquando faciem duplicem demonstrabant et linguas proprias foro prostituere non
timebant.
9.3.11 Quomodo
ius canonicam in decimam.
Decima rotunda non erat, quia videbatur in partibus esse collisa,
et sciri non poterat unde contraxerat originem, quia non habebat certum principium neque
finem, ex eo quod aliquando a nona, aliquando ab undecima videbantur oriri. Item quandoque
recipiebat augmentum, quandoque patiebatur ecclypsim, quoniam pars addita destruebat
assidue precedentem. Preterea nona et decima erant muneribus onerate, et volvi non
poterant sine sonitu metallorum.
9.3.12 Quomodo
theologia in undecimam.
Undecima volvebatur iuxta scalam quam vidit Iacob erectam, quam
sequebantur numero paucissimi, quoniam reliquerant eam qui suum caracterem et sigillum in
medio capitum deferebant. Plorabat etiam Rachel filios suos et consolari non valebat,
quoniam post octavam et nonam lucri gratia vagabantur et dimiserant venam aquarum
viventium que fluunt impetu de Libano, et venerant ad aquas contradictionis ubi assidue
iurgabantur.
9.3.13 Quomodo
nigromantia, geomantia, pryromania, spatomantia et alchimia in quinque rotulas futiles
transumantur.
Illi autem, qui sequebantur quinque subtiles rotulas, per eas
effectus impossibiles requirere videbantur, de quorum numero erant nigromantici,
geomantici, pigromantici, spatomantici et alchimici, quos vana spes absque dubio refovebat
et demergebat sepius in profundum inopie abhorrende.
9.3.14 Quomodo
nemo scire posset omnes diversitates transumentium.
Omnes vero transumentium et transumptionum diversitates nemo
scire valeret, quia universe nationes orbis, terrarum continentia et contenta, rerum
genera et species secundum linguarum et voluptatum varietates transumunt, nec
excludi posset aliquis vel aliqua homo vivens, qui vel que transumpte non loquatur,
postquam incipit rationem et intellectum habere. Insuper omnis allegoria,
tropologia, moralitas, metaphora et quelibet locutio figurata transumptiones possunt et
debent merito nominari, quia omnis, qui unum ponit et aliud intelligit, sine omni
dubitatione transumit. Unde colores, qui de transumptionibus oriuntur sicut stelle
celi et arene maris numerari valerent.
9.4 De adulationibus.
9.4.1 De commendatione adulationis.
Inter eximias adornationes potest adulatio computari, quia
per eam captamus a mortalibus omnimodam benevolentiam et favorem.
9.4.2 Qualiter
omnes compellantur aliquando adulari.
Omnes fere mortales, cuiuscumque sint ordinis vel
conditionis, aliquando adulari coguntur, quia navigant in mari fragilitatis humane.
Unde quod fugere nequeunt, vitare non possunt, presertim cum sublimes persone sine
adulationis placari non possint. Vane siquidem glorie cupidi sicut utres inflantur
et deinflantur. Quare te ad replendum cotidie sufflare oportet.
9.4.3 Quid
sit adulatio circa merita personarum.
Adulatio est demulcens et blanda verborum positio per quam
improvidus ultra id, quod est inducitur ad credendum.
9.4.4 Quatuor
solemnes adulationes.
9.4.4.1 Adorna thalamum
tuum ecclesia Tolletana, incende thurasamata, sterne pavimenta et suscipe non
archiepiscopus, sed reguem archiepiscoporum, gemmam presulum, coronam antistum et
candelabrum pontificum singulorum. Petrus equidem a soliditate sapientie nominatur
et super hanc petram philosophie sedem posuit principalem. Nam ita profunde ac
immense scientie radiis illustratur, quod universum clarificare videtur orbem terrarum,
quia non fuit nec erit ei similis in qualibet facultate. Quid enim referendum titulo
prosapie generose et angelica forma corporis, quibus illum natura beavit! Oculi eius
columbarum facies quasie examinatum argentum, unde turbe numerant gressus ipsius.
Item non legitur in Novo aut Veteri Testamenti, quod unquam
fuerit homo, qui sanctam et moralem gratiam ita promeruerit.
9.4.4.2 Ab initio et ante
secula non fuit auditum, quod mortalis aliquis ita esset moribus et scientia
redimitus. Unde gentes et nationes preconia vestrarum laudum extollunt et fama
vestre celsitudinis ultra nationes exteras convolavit.
9.4.4.3 Cum celi noscantur
vestram gloriam enarrare, non est mirum si vestra merita, virtutes et magnalia specificare
nescio et non possum. Milia quippe milium proclamant et dicunt: "O, si
videre meremur illius faciem gloriosam, quem totius orbis terrarum intueri peroptat."
9.4.4.4 In linea generationis
humane numquam fuit nec erit, in quem ita confluxerint universe nature dotes, aut qui apud
omnes gentes et nationes tantam promeruerit gratiam et gloriam invenire. Nec mirum,
quia vos estis immense scientie, magne nobilitatis et excellentis prosapie titulo
insigniti, et mira et ineffabili pulcritudine radiati. Preterea in labiis vestris
omnis gratia est diffusa, unde videmini obtinere quandam speciem deitatis.
9.4.5 De mirabili adulatore quem
vidi.
Adulatorem vidi adeo circumspectum, quod cum quidam
episcopus populo predicabat, incepiebat corrugare faciem et flectere supercilia secundum
quemdam sophisticum motum compunctionis fundendo lacrimas pietatis. Tundebat pectus,
pulsabat cum brachio socios, ut audirent, distantibus manu silentium imponere videbatur,
et semper aciem faciei tenebat ad predicantem erectam. Demum ad illum accedens
lacrimabili voce dicebat: "Benedictus ventus, qui vos portavit et verba, que
suxistis. Verumtamen vos non eratis, qui loquebamini, sed Spiritus Sanctus in
specie columbe vobis omnia predicebat, sicut ego ipse corporeis oculis intuebar. Sed
de vobis conqueror, quoniam uxor mea propter vestram predicationem non vult, quod uxorali
debeam thoro potiri." Sicque adulator ille totum presulem possidebat.
Profecto qui adulationes diligit, adulatoribus elargitur.
9.4.6 Quomodo
possit quilibet singulis adulari.
Universis mortalibus, cuiuscumque sint ordinis vel conditionis in
suis operibus et officiis poteris adulari, dummodo congruis temporibus exerceatur
ministerium adulandi.
9.4.7 De
reali adulatione.
Realis equidem fit adulatio per gestum, nutum, indicium et
signum. Item adulamur inclinando capita, removendo infulas, flectendo genua,
osculando manus, pedes, excutiendo pulverem, abiciendo pilos et aptando vestes.
Preterea itur obviam, curritur ad accipiendum frenum, trahuntur calcaria, flectuntur genua
quando bibitur et sub scypho manus cum reverentia extendutnur, et offeruntur vel mittuntur
quandoque munera gratiosa.
9.4.8 Quomodo
possit aliquis mulieribus adulari.
Cum sit fere omnis mulier ex fragilitate complexionis dedita
vanitate, facile sibi poterit quilibet adulari. Verumtamen, quantumcumque sit annosa
vel deformis, de forma corporis non est omittendum, et postea sit ad sapientiam et mores
progressus.
9.4.9 De
adulatio quam fit in cantu.
In cantu quidem fit adulatio multiformis, quia melodia est
umbrosum adulationis velamen, ex eo quod cantus demulcet et verba suadent.
9.4.10 Que
differentia sit inter laudatorem, adulatorem et derisorem.
Laudator considerat locum, tempus et similitudinem veritatis, non
excedit modum, cum discretione commendat, et quod refert, de puritate cordis
procedit
9.4.11 Quibus
valeant similari.
Laudator similatur angelo, adulator diabolo et derisor simie
potest merito comparari.
9.4.12 Quid
sit subsannatio et unde dicatur.
Subsannatio est ostensio dentium, qui transumptive sanne dicuntur,
cum narium corrugatione ac extensionibus labiorum.
9.4.13 Unde
dicatur.
Subsannatio dicitur a sub et sanno, quia sanne
dicuntur esse dentes, qui labiis operiuntur. Nam qui subsannat, labia elevat et
dentes ostendit.
9.4.14 Quid
sit detractio.
Detractio est clandestina depravatio scientie seu morum ex
invidia vel abusu procedens.
9.4.15 Quid
proditio.
Proditio est dulcis et melliflua verborum positio de conscientia
venenosa procedens.
9.4.16 De
moribus subsannatoris.
Subsannator aerem attrahit vel emittit cum ostensione dentium et
naribus corrugatis in odium vel vituperium alicuius.
9.4.17 De
moribus detractoris.
Detractor autem in presentia silet, retro refert, terga
insequitur, verum obumbrat, falsum roborat, et dubia in deteriorem partem interpretari
molitur.
9.4.18 De
moribus proditoris.
Proditor quidem insignia fidelitatis ostendit, suavia et dulcia
verba promulgat, amplexatur, applaudit, blande ridet, maxima pollicetur, obtestatur Deum,
sub pacis federe osculatur, ad iurandum est pronus, vina saporosa propinat et preparat
cibaria delicata. O quam crudelia sunt et mortifera iacula proditorum, unde vix aut
numquam erit, qui sibi possit ab illorum ictibus precavere.
9.4.19 Tres
descriptiones de promissione fallacii.
Promissio est adulationis filia, que de vento fuit mendacii
generata. Promissio est vocale meritum, quod sepius ab adulatoribus cum risu et
amplexu confertur. Promissio est ventus, quo stultus inflatur velus vesica, que
crepat.
9.4.20 Narratio
doctrinalis de variis promissionibus.
Omnis, qui pollicetur quod complere non optat, officium sufflandi
assumit. Ille vero, qui sperat, est velut uter, qui vento repletur. O quot et
quanti vanis promissioniibus deluduntur, et quot a principibus et magnatibus de immensis
laboribus et gratissimis obsequiis, que fideliter impenderunt, de promissionum ventis
utres inflatos reportant! Mulieres autem viros vanis promissionibus frequenter
deludunt. Verumtamen ipse de pollicitis aliquando puniuntur et sophisticis muneribus
deluduntur.
9.4.21 Quid
sit promissio veritatis.
Promissio est presagium gratie vel indicium benevolentie
plenioris.
9.5 De adornatione, que dicitur pro et
contra.
9.5.1 Narratio doctrinalis.
Commendare personas et cuncta, que sub celi ambitu continentur,
et eisdem commendationibus contraire ad humanam fragilitatem noscitur pertinere.
Unde quia fere omnibus placere videtur, ideo pro et contra inter adornationes debent
merito computari. Verumtamen si alterum defuerit, non erit adornatio, quia unum sine
altero esse non potest.
9.5.2 Pro
grammatico.
Proponit grammaticus quod grammatica est scientia recte loquendi
recteque scribendi, omniumque artium fundamentum, unde admonet ut arti grammatice opera
impendatur.
9.5.3 Contra.
Primum membrum tue diffinitionis est falsum, quia grammatica non
est scientia recte loquendi: immo dicere debeas recte construendi, unde necessaria est in
principio cuilibet erudiendo. Verumtamen quemlibet grammaticum assimilo illi qui est in
dentium plantativa, qui lac sugit, recitat sicut puer, et cum dicit `a, e, i, o, u'
tamquam infantulus vagire videtur. Iudicat enim, de solis vocibus, quia bene sustinet et
defendit regulariter esse dictum "musca parit leonem" et "angelus est
cimera".
9.5.4 Pro
dialectico.
Exclamat dialecticus asserens quod dialectica est veritatis et
falsitatis inquisitiva, viam aperit ad omnia initia methodorum. Unde sine ipsa nil potest
aliquis ostendere vel probare. Nam dialecticus sicut falco volitat, tendit arcum
questionis, infigit syllogismi sagittam, velut balista percutit resistentes, retundi
iacula opponentium, instat probabiliter, decipit sophistice, similium, contrariorum et
expositorie clipeo se defendit.
9.5.5 Contra.
Garrule quid declamitas, cur sub umbra verborum deliras? Ecce dum
ad similitudinem demoniaci percutis, volas manuum perstrepere plantis pedum non cessas,
garriendo spumas, et spumendo garris, tuum nomen pronuntiare non vales. Scientia nempe tua
est velut alumen quod est preambulum ad colorem, sed per se cuiuslibet panni substantiam
dissipat. In dialectica nempe tua nudus ut vermis remanes, qui contra naturam nititur esse
pilosus.
9.5.6 Pro
oratore.
Sedet orator pro tribunali, et quoslibet ad oratoriam facultatem
invitat, allegans quod nemo potest in aliquo recte loqui seu gloriose vocis munimine
roborari, aut habere copiam in dicendo, vel dulci sermone, suasibili exordio et affabili
oratione alicui suadere sine documento rhetorice facultatis.
9.5.7 Contra.
Fistula oris officium ventum de utre attrahit, quo resonat et
dulciter modulari videtur, et sic orator de vento mendacii audientium aures demulcet,
linguam ad vendendum exponit, defert adulationis oleum in vesica, nugatur in equivocis,
nititur in verisimilibus, rectum enervat, falsum roborat, damnat innocentem, liberat
condemnandum, quia non curat de falsitatibus manifestis, dummodo probare valeat quod
intendit.
9.5.8 Pro
arithmetico.
Suadet arithmeticus numerare et abacum reputat pro veritate,
affirmans quod super omnia est scientia numerorum.
9.5.9 Contra.
Tu nihil vel parum habes sed numeras aliena, et in hoc est
similis tibi quilibet trapezita. Unde non debes de scientia numeri gloriari, quia
vix aut numquam est aliquis adeo inscius, qui suam ignoret pecuniam numerare.
9.5.10 Pro
geometra.
Geometra quoslibet ad scientiam mensurandi sollicitat et invitat,
credens esse arduum triangulos et quadrangulos designare. Loquitur enim de
sesquiqualtera proportione, reflectens lineas ad diametrum et firmiter affirmat hanc esse
scientiam eligendam.
9.5.11 Contra.
Faber lignarius geometre mensurando concludit, et quod sub nube
recitat et vocaliter instruit esse agendum sibi realiter demonstrabit. Vidi namque
hominem penitus litteratura carentem, qui super magnum flumen spatium aeris in animo
taliter comprehendit, quod superpositis lignis, que in litore fuerant ordinata, pons est
absque omni superabundantia et diminutione perfectus. Rurales etiam viri absque
geometria vocali cum funiculis et perticis medius terram mensurant, quam facerat aliquis
geometra.
9.5.12 Pro
musico.
Ad dulcia modulamina vocum invitat musicus modulari volentes,
asserens quod sine musica in vanum laborant cantores.
9.5.13 Contra.
Sine arte musica dulciter modulatur in arboribus Philomena,
alauda in ascensu poli pariter et descensu ponit dulcissimas melodias. Calandra,
merulus et cardellus propter varias et iocundas voces cum summa diligentia nituntur nec
indigent subsidio musico in cantando, et numquam per dissonoritates transcurrunt. Et
homo, qui est rationabilis creatura, errat dum temperat monochordam. Et
quantumcumque fuerit in musica eruditus, in vocum positione delirat sepe. Unde
cantandi artificium relinquendum est consuetudini et nature, non regulis musicorum.
9.5.14 Pro
astrologo.
Dicit se astrologus dispositiones celestium intueri, cursus
inspicere planetarum, eosdem subtilitate ingenii coequare, XII. signa celestia
contemplari, numerare stellas, zodiacum et spheram in ipso firmamento comprehendere
intellectu, per que dicit se iudicare posse de futuris.
9.5.15 Contra.
Homo derivatus ab humo, dum oculos figit in celum et stellas
numerat, sine dubio delirare videtur. Humanitatem enim transcendit, qui celestia se scire
fatetur. Profecto nullus est in terris, qui adhuc fuerit in celis, nisi qui de celo
descendit, quia celum celi domino, terram autem dedit filiis hominum, in quam per
privationem vite rediget corpora eorumdem. Profecto multi viri providi et
discreti per coniecturas presagiunt de futuris. Nam et sagaces naute plus noverunt
de mutationibus temporum per consuetudinem, quam astrologi per doctrinam.
9.5.16 Pro
physico.
Moderatores humane nature et scientie naturalis inquisitores
physicam profitentur, que dicitur a physi quod est natura. Isti quidem veram sapientiam
imitantur dum corporibus que alterationi, fluxui et corruptioni ex prime contagionis vitio
subiacent, subvenire laborent, quorum officium est sana corpora in sanitate physicalibus
auxiliis conservare, egra et neutra reducere ad temperantiam, vel pronosticare secundum
physicales regulas de futuris.
9.5.17 Contra.
Omnes qui exercent ministerium physicale, illis valent merito
similari qui pro diurno denario insistunt vacuationeibus cloacarum, ex eo quod iugiter
urinas et stercora contemplantur. Verumtamen dicere non timescunt nihil turpe quod utile,
unde habere peroptant lucrum in bursa et fetorem ad nares.
9.5.18 Pro
metris et rythmis.
Metra et rythmi hoc habent facere in litteratura, quod in vulgari
cantiones, quia lucrari et delectari volebant poete.
9.5.19 Contra.
Metrificatores et rythmatores histrionum vestigia imitantur, et
cum sillabas numerant et pedum inspiciunt quantitatem, magistri debent pedanei
nominari.
9.5.20 Pro
nigromantico.
Nigromanticus per imagines, incantationes, fumigia, et
consecrationes librorum mirabilia se facere arbitratur, quia demones credit includere in
anulo vel ampulla.
9.5.21 Contra.
Nigromanticus dum laboriosis et damnabilibus exercitiis libros et
anulos nititur consecrare, execrabilis remanet et delusus, quia ipso iure fit
infamis.
9.5.22 Pro
spatomantico.
In spatulis arietum et pectoribus gallinarum spatomanticus
prophetizat, quare dignis est laudibus commendandus.
9.5.23 Contra.
In spatulis arietum et substantiis gallinarum carnes, lane atque
penne sunt absque dubio requirende, sed ossa canibus relinquantur, qui acutis dentibus in
eis presagiunt de futuris.
9.5.24 Pro
pyromantico.
Pyromanticus prophetizat in igne, quare potest dici dominus ignis
atque caloris.
9.5.25 Contra.
In eximie stultitie fornace pyromanticus aduri videtur.
Unde credit, quod progrediatur de ignitis carbonibus et flammis prophetia.
9.5.26 Pro
alchimico.
Alchimicorum caterve celos transcendunt, ex eoque cum quatuor
spiritibus nituntur in aurum et argentum metalla vilia transmutare.
9.5.27 Contra.
A specie fatuitatis vix potest alchimicus removeri, quia si
milesies oberraret, semper diceret "unum deficit et de contingentibus omisi" et
ita pervenit ad nihilum, quia `de nihilo nihil' est verum.
9.5.28 Pro
iure civili.
Ius civile Urbis et orbis optinet monarchiam dum statuit,
interpretatur, iubet, iudicat, punit et permittit; unde qui contra ius loquitur peccat in
crimine lese maiestatis, cuius digna vox principem legibus absolutum profiteri dignatur
esse legibus obligatum.
9.5.29 Contra.
Civile ius non debet plurimum commendari, quoniam per ipsum vel
cum ipso non regitur centesima pars orbis terrarum et quia est vituperabile per statuta
rusticorum iugiter evanescit et plebiscita popularia sibi auctoritatem subripiunt et
favorem; quia non sine pudore tacere cogitur ubi plebiscitum loquitur vel statutum.
9.5.30 Pro
iure canonico.
Ius canonicum est ecclesie robur, fidei orthodoxe columna, et
candelabrum super quo ponitur luminare maius ad illuminationem Christiane plebis. Per
ipsum namque solvuntur omnes ambigue questiones, et dirimuntur ambigua facta
causarum.
9.5.31 Contra.
Ius canonicum substentatur baculo alieno, quia non habet originem
actionum; unde tam in contestatione litis quam in cognitione causarum et sententiis
promulgandis iuris civilis cogitur auxilium implorare. Preterea vix aereos flatus
exhaurit, quia magna pars est adhuc in utere matris, unde scire non potest qualiter natura
membra capiti concordabit, maxime cum pars producta iugiter varietur.
9.5.32 Pro
theologia.
Contra theologiam, que in terris divinis est obsequiis deputata,
nemo debet aliquid allegare, quoniam illa sola remanebit, quando causidicorum lingue
cessabunt et mundana sapientia destruetur.
9.6 De
palliatione.
9.6.1 Quid sit palliatio.
Pallatio est quoddam velamen, sub quo aliquando veritas,
aliquando falsitas occultatur.
9.6.2 Unde
dicatur.
Dicitur autem palliatio a pallio per subtilem
transumptionem. Nam cum quis elevat pallium et reflectit, aliqua valet sub eo
curialiter occultare.
9.6.3 Narratio
que fit sub palliatione.
Sub minori cautela fuerat pecunia derelicta, unde pincerna illam
reposuit et abscondit, ut camerarius in custodiendis rebus diligentiorem sollicitudinem
adhiberet. Quare sagax et providus est absque dubio reputandus. Non fuit ergo
in eo furti species, immo provisionis instructio vel cautela. Nimirum in multis
locis consimile frequenter accidere consuevit, vel fit aliquando rerum absconsio causa
ludi et socialis dilectionis. Verum est, quod famulus illius absque voluntate domini
pecuniam iam expendit. Unde culpa est in famulatum retroquenda. Scitur enim et
a nemine dubitatur, quod multa committtunt famuli, que noscuntur dominis displicere.
9.6.4 De
consuetudine palliatoris.
Omnis, qui palliatione utitur, consuevit aliquando subridere,
verba proferenda mollia et exempla inducere cavillosa.
9.7 De subductione.
9.7.1 Quid sit subductio.
Subductio est adornatio, qua vir subdolus inducit hominem
improvidum ad revelandum minus provide veritatem vel mendacia proferendum.
9.7.2 Narratio
doctrinalis.
Omnes fere viri et mulieres habent subducendi scientiam a
consuetudine vel natura. Unde non expedit inducere suffragia exemplorum.
9.8 De ironia.
9.8.1 Quid sit ironia.
Ironia est adornatio sub cuius velamine absconditur indignatio
referentis.
9.8.2 Narratio
doctrinalis.
Viri subdoli et sagaces utuntur occultissima ironia, et minus
providi nesciunt sagaciter sub ironie velamine indignationem animi occultare.
9.9 De fictione.
9.9.1 Quid sit fictio.
Fictio est adornatio, qua fingitur aliquid, quod potuit esse
verum, aut fabula, que contraria est penitus veritati.
9.9.2 Narratio
doctrinalis.
Huiusmodi autem fictiones sunt exempla, que roborant propositum
oratoris.
9.10 De
aggregatione.
9.10.1 Quid sit aggregatio.
Aggregatio est dictionum vel distinctionum positio ad laudem vel
vituperium alicuius.
9.10.2 De
aggregatione positivorum.
Ad laudem, ut "largus, affabilis, benignus, humilis,
pius, providus, honestus, sapiens et discretus." Ad vituperium, ut cum
dicitur "avarus, rigidus, crudelis, superbus, impius, improvidus, luxuriosus,
insipiens et indiscretus." Potest dici de aliqua "generosa,
preclara, amabilis, affabilis, tractabilis et iocunda," vel per contrarium "rustica,
tenebrosa, odibilis, rigida, horrida et inepta."
9.10.3 De
aggregatione comparativorum.
De comparativis autem duarum vel trium dictionum debet fieri
aggregatio, pro eo quod oratio facilius recipit incrementum, ut "sapientior,
benignior et discretior illo non vivit in orbe" aut "insipientior,
crudelior et indiscretior illo non invenitur hodie super terram."
9.10.4 De
aggregatione superlativorum.
Superlativorum equidem raro vel numquam debet fieri aggregatio,
ex eo quod superabundantes generant intellectus. Ceterum si contingat de
superlativis aggregationem fieri, duo tantummodo aggregentur, ut "benignissimus et
largissimus" vel "crudelissimus et avarissimus."
9.10.5 De
aggregatione verborum.
Verba quoque similiter aggregantur, sicut in multorum operibus
operis invenire. nam ego ipse in prologo Boncompagni dixi, quod "invidia
murmurat, stridet, fremit, delirat, devorat, anxiatur, livet, pallet, perstrepit, nauseat,
delitescit, latrat, mordet, furit, spumat, insanit, ignit, garrit et gemit, quando nocere
non potest."
9.10.6 De
aggregatione participiorum.
De participiis potest fieri agreggatio, sed ultra duo aggregari
non debent, ut "iubilans et exultans."
9.10.7 De
aggregatione pronominum.
Pronomina vero aggregari possunt. Verumtamen adornatio
facta ex illis iocunda esse non potest.
9.10.8 Quod
prepositiones et coniunctiones aggregari non possunt.
Prepositiones et coniunctiones ab aggregationis consortio
repelluntur, quoniam earum significationes coguntur aliis deservire. Sed
prepositiones inveniuntur aliquando aggregate, cum dicitur "pro et contra."
9.10.9 De
aggregatione adverbiorum.
Duo siquidem adverbia et non plura debent sine dubio aggregari,
ut "prudenter et caute".
9.10.10 De
aggregatione interiectionum.
Interiectiones vero possunt aliquando aggregari, ut "ve,
ve, proh dolor." Et notandum est, quod quandocumque dictiones taliter
aggregantur, quelibet dictio unius dictionis locum noscitur obtinere.
9.10.11 De
conduplicatione aggregationis.
Agregationis conduplicatio fit ex duabus dictionibus in septem
vel octo aut novem distinctionibus in una clausula positis.
In septem hoc modo: "Spe firmus, fide preclarus, caritate
fundatus, benignitate decorus, honestate preditus, munificentia commendatus, sapientia
redimitus."
In octo hoc modo: "Spei perversor, fidei violator, caritatis
persecutor, benignitatis adversarius, honestatis corruptor, avaritie baiulus, iniquitatis
fomes, sapientie impugnator."
In novem hoc modo: "Diligit iustitiam, amplectitur equitatem,
stat intrepidus, inexpugnabilis manet, inexplicabilis durat, inconcussus perseverat,
incorruptus letatur, cuncta perquirit, examinat universa."
De tribus dictionibus positis in clausula de decem distinctionibus:
"Certus in spe, dulcis in eloquio, in misericordia humanus, in respondendo suavi,
in discernendo sagax, in prosperitate mitis, in adversitate securus, strenuus in facto,
benignus in aspectu, fortissimus in conflictu."
De quatuor dictionibus in quatuor distinctionibus positis hoc modo:
"Hic publicum homicidium perpetravit, periurium committere non erubuit, nocturno
tempore surripuit monialem, sacrilegus extitit predator."
De quinque dictionibus in quatuor distinctionibus positis hoc modo:
"Novit Deus, qui cuncta rimatur, quod dicta crimina non commisi nec sum culpabilis
de obiectis, quamquam hec mihi obiciant detractores."
De sex dictionibus in tribus distincionibus positis hoc modo: "Unius
macule corruptela fama laudabilis denigratur, crescit pudor infamie plurimum relationibus
detractorum et subdola machinatio vestigium impedit bonitatis."
9.11 De
synonimis.
9.11.1 De synonimis.
De synonimis potest fieri adornatio, qua frequenter utimur pro
gravaminibus et miseriis afflictorum. Unde cum dicitur "Miser sum corpore,
miserior sum habitu, miserorum carmen decanto, mihi miseria superadditur, miserie mee non
est finis, quia miserior me non potest alicubi reperiri. Unde possum dici
miserrimus, ex eo quod nemo est, qui meam velit miseriam misericorditer intueri"
vel "Felix esse videtur, qui felicitate pollet. Unde inter felices, immo
felicissimos potest merito computari, ex eo quod omnes eventus habet felices et cuncta
sibi felicius respondent ad votum."
9.11.2 Notule
doctrinali.
Et est notandum, quod huiusmodi aggregationes et simonia possunt
extendi et breviari secundum libitum perorantis.
9.12 De
digressionibus.
9.12.1 Quid sit digressio.
Digressio est declinatio materie inchoate in aliam, que per
obliquum vel directum respicit principalem.
Item digressio color est, sed frequentissime discolorat, cum
orator in tantum digreditur, quod transgreditur, ex eo quod sine prolixitas vitio nescit
vel non potest redire ad materiam principalem. In digressionibus autem ponuntur
similia et contraria, ut principales materie roborentur. Ponuntur etiam
inaudita, ut homines adiuventur. Item ponuntur iocose narrationes et fabule, ut
retineantur auditores tedio fatigati.
9.12.2 Unde
dicatur.
Digressio dicitur a `digredior, digrederis'; nam omnis
qui digreditur, diversimode graditur. Item digressio similis est rivulo, qui de flumino
progreditur, qui extra quandam partem irrigat, sed postmodum ad locum facit
regressum.
1
For the views of pope Innocent III himself: Die Register
Innocenz III ed. OTHMAR HAGENEDER and ANTON HAIDACHER (Vienna-Cologne 1964) 1.326, pp.
472-474 and 1.530, pp. 765-769 (= X.1.7.2). Texts on the background of this idea include
Exod. 22.28, Psal. 81.6; Decretum Gratiani D.96 c.7, C.11. qu.1 c.41, C.12. qu.1
c.15; Bernard of Clairvaux De consideratione 2.1.4 (PL 182.744), 4.7.23 (PL
182.788, quoted by Peter of Blois Ep. 144, PL 207.59). Discussion of these texts by
JEAN RIVIERE "Sur l'expression `Papa-Deus' au Moyen Age" in Miscellanea
Francesco Ehrle (Rome 1924) 2.276-289 and idem art. in Revue des sciences
religieuses 2 (1922) 447-451.
2 The
epithet Panuntium mixes derision (pannucius = ragged, tattered) with an historically apt
comparison: bishop Paphnutium of Thebais (+ 356) defended the more lax oriental practices
with regard to clerical celibacy against the more strict western practices at the council
of Nicaea. I Nicaea c. 3 was transmitted in Codex Iiustiniani 1.3.19 and Decretum
Gratiani D.32 c.16. See DüMMLER SB Berlin 1902, p. 425 note 2. The
patriarch of Aquileia's contradiction of the stringent attack on clerical incontinence in IV
Lat. 14 pertained to its final clause, which sanctions a greater penalty for a priest
married according to the eastern rite if he falls into the sin of incontinence (Qui
autem secundum religionis sue morem non abdicarunt copulam coniugalem, si lapsi fuerint,
gravius puniantur, cum legitimo matrimonio possint uti). IV Lat. 14 was
transmitted in IV Comp. 3.1.2 and Decretales 3.1.13; cf. ANTONIO GARCIA Y
GARCIA ed. Constitutiones concilii quarti Lateranensis una cum commentariis glossatorum
= MIC, Series Glossatorum 2 (Vatican City: BAV, 1981).
According to MICHELE MACCARONE, "Cura
animarum e parochialis sacerdos nelle costitutizioni del IV concilio
lateranense (12150. Applicazioni in Italia nel sec. XIII." in Pievi e Parrocchie
in Italia medioevo (sec. XIII-XV) = Italia Sacra 35 (Rome 1984) 81-195 at
139-140, "La clausula, che non si riscontra in altri concili occidentali,
probabilmente fu intradotta su richiesta dei vescovi latini in Oriente, che dovevano
affrontare questo problema nei rapporti con il clero di rito orientale, e forse venne
sollecitata anche dai vescovi dell'Italia meridionale, che si trovavano in simile
situazione. Essa costituisce un esplicito riconoscimento, fatto dal IV concilio
lateranense, della legittimita delle consuetudini canoniche orientali, divergenti da
quelle occidentali su questo punto importante, d'altra parte rapprasenta un'implicita
presa di posizione di fronte all'opinione, difesa anche da Uguccione, che l'obbligo del
celibato fosse inscindibile dall'ordinazione sacerdotale. For the canonistic
background, see F. LIOTTA La continenza dei chierici nel pensiero canonistico classico.
Da Graziano a Gregorio IX (Milan 1971). For another story about IV Lateran, see above,
Rhetorica novissima 8.1.18.
For other evidence of contemporary
resistance to IV Lat. 14, see three poems printed in THOMAS WRIGHT The Latin Poems
Commonly Attributed to Walter Mapes = Camden Society 16 (London 1841): "De
Concubinis Sacerdotum" (inc. Prisciani regula penitus cassatur..., 171-3),
"Consultatio Sacerdotum" (inc. Clerus et presbyteri nuper consedere...,
174-179), "De convocatione sacerdotum" (inc. Rumor novus Angliae partes
pergiravit..., 180-2).
3
Cf. Matthaeus of Vendome Ars versificatoria pr. 7 (ed.
FRANCO MUNARI 3.43)
***
© Steven M. Wight, Los Angeles 1998
Scrineum © Università di Pavia 1999